Autpol es un siti fortificac màger en Montanha Negra, compausat del castrum que dempuèi mai de 1000 ans domina lo val d’Arnèta e lo puèg ont èra bastida la glèisa anciana de Sant Salvador. A son entorn se bastiguèron fòrçes ostals al long dels sègles. Cinq pòrtas gardavan las dintradas del castrum e de muralhas assolidadas per de torres carradas l’enrodavan. Al mièg, se trapava una capèla gotica, que se’n pòt encara endevinar qualques tròces.

Tres « castèls » fasián partida de l’ensemble, lo Castèl de La Sala per debàs amb sas rengadas de pèires alinhadas en opus spicatum (espina de peis), tipicas del sègle desen acompanhat per dos ostals del metèis tipe. Davant la pòrta del denaut lo « Fòrt de Ribièira », benlèu del sègle setzen contrarotlava la dintrada. De la torre, al suc de la ròca (lo ròc de la Vèrge) res demòra pas.

Ciutadèla refugi pels Catars aprèp ésser estada un naut luòc d’acuèlh pels trobadors, patiguèt dels assalts de Simon de Monfòrt, en abrial de1212. Foguèt adobada puèi arroïnada per la guèrra de cent ans. Tornèt levar lo cap a la fin del sègle setzen e fin finala abatuda per las tropas reialas l’an 1629. 

Al sègle XVIII, d’ostals novèls se tornèron bastir e, dempuèi, lo vilatge d’Autpol a pas quitat d’èsser abitat. Sus un esperon rocassut, aquel ancian vilatge medieval domina las gòrjas d’Arnèta e la vila de MasAmet. Aqueles bauces rocassuts porgisson fòrça de cavas propícias a la nidificacion de mai d’un aucèl roquièrs, tal coma lo Falcon Pelegrin o lo Duc, còp e còp agachats sus aquel airal. Las ratapenadas trapan tanben de jaces favorables per la reproduccion, l’ivernatge e lo transit, tant sul patrimòni bastit del vilatge coma sus aquelas parets rocassudas.