L’espandida d’aiga es trevada per d’anatids (Còlverd ) e de Margòls (Cabusset tufat). Aquela darrièra espècia s’apitança de peissonets e de babòtas . Es un nadaire e cabussaire de tria. Amusatz-vos de cronometrar sas apnèas quand percaça sa mangisca, es un crane campion.

La pichona rausièra que ribeja una part del lac es pas pron bèla per recaptar las espècias tipicas d’aquel ambient talament particular. Çaquelà, las coalongas, los faucilhs e las irondas, al temps de l’estiu investisson l’endrech en cèrca de mangisca.